Sunday, September 5, 2021

සී තාත්තා සහ මුරුංගා

සී තාත්තා සහ මුරුංගා





පහුගිය දොහේ දවසක යාලුවෙක් පණිවිඩයක් එවල තිබ්බ මුරුංගා තියෙනවය අරං යන්ට එන්නය කියාලා. ඔය ගමන මුරුංගා මුරුංගා කියල සිත සිතා ඉන්න ඇහිල්ලෙ තමා මට මතක්වුනේ මේ මුරුංගා කියන්නෙ අපේ පවුලට බද්ධවුන දෙයක් නෙදෝ කියාලා. මම මේ පවුලේ පුරාණේ දිගහරිනවය මගේ ලොකුකම් කියවන්න තනනවය කියාලා කෝප ගන්ට එපා. කෝප ගත්තාය කියාලා මට කොරන්ට ඇති ඇටිකෙහෙලකුත් නෑ මෙව්ව සත්‍ය සිද්ධි නිසා. බොලාලට මතකනම් මම කලින් දොහකත් කීවා මගේ සීතාත්තගෙ ලෝකප්‍රසිද්ධ කෙරුම් ගැන. එතුමා අපේ පරම්පරාවට ඉරබටු තරුව වගේ දීප්තියක්ම ගෙනාව උත්තමයා නෙව.

ඉරයි හදයි ආදරෙං වෙලිලා උන්න දොහක රටටම අඳුරෙ ගිලිලා උන්නාය කියල මං කීවා මතක ඇතිනෙ. මේක ඊට පස්සෙන් පහු වෙච්ච සිදුවීමක්. සීතාත්තා කියන්නෙ ඉරේ එවුං මහ නාහෙට නාහන දඩබ්බර උන්ය කියල. ඉරයි හඳයි ලංකරගෙන පාලමක් හදන්නය කියල උත්සහ කල හඳේ රජ්ජුරුවන්ට අරිආදු කරන්ට තැනුවය කියනව ඔය ඉරේ එව්වො. මෙහෙ එහෙ කියල වෙනසක් නෑ අයුබොවන්ඩ කොහෙත් ඉන්නව හොද වැඩකට අකුල් හෙලල ජාතියම අනතුරේ හෙලන්ට කැපවෙච්ච එව්වො. 

ඔය පාලම හදන්ට හේතුවුනේ ඉරෙන් ගින්දර ගන්නත් හදෙන් සීතල එහෙට යවන්නත් කියල තමා කියන්නෙ. කෝමින් කෝම හරි ඔය අරියාදුව නිසා පාලම් හැදීම කෙසේවෙතත් දෙරට අතර නොහොදනෝක්කාඩු ඇතිවුනාලු. සීතාත්තා ඉතිං කාකවුරුත් එක්ක වුනත් හිත් අමනාපකං ඇතිකොරගන්ට අකමැති කෙනා වෙච්චි. උන්නාන්සෙ දන්නව දැන් කොයියම් මොහොතක හරි දෙඟොල්ලොම උදව් ඉල්ලගෙන සීතාත්තා මුලිච්චිවෙන්න එනබව. සී තාත්ත තද නීතිරිති කාරයා නිසා උදව්ව ලැබෙන්නෙ මුලින්ම එන එකාලය විතරයි.
ඉරේ එවුන් කාලෙකට කලින් සෙනසුරු එව්වො එක්ක කරගත්ත අරියාදුවෙදි සීතාත්තගෙන් කැටපෝලයක් ඉල්ලං ගෙහුං තියෙනව. ඔය දැන් අපි සෙනසුරු වටේ තියෙනව කියන වලල්ල ඇතිවෙලා තියෙන්නෙ ඒ කැටපෝලෙන් විද්ද ගල් නිසා. මෙව්ව බොලාලට විද්‍යාවෙදි ඉගෙන ගන්ට ලැබෙන්නෙ නෑ අන්න ඒකයි මතකෙට එන මේ කතාකෑලි මේ අස්සෙම ඔබල බොලාලට දැනුම දෙන්ට තනන්නෙ. මෙව්ව වරුණෙ කියවනව කියල අහකදාල ජීවිතේට පාඩු කරගන්ට එපා ඕං.

සී තාත්තට මුලිච්චෙ වෙන්න හඳේ විදෙස් ඇමතිතුමා ඇවිත් තියෙන්නෙ තමන්ගෙ පුද්ගලික හාව පිටේලු. ඒ තරමට ආරක්ශාව ගැන එතුමට බයක් තිබ්බෙ නෑලු සී තාත්තා මුලිච්ච් වෙන්ට. මොකදෑ මේ තනිපංගලමේ අහද්දි එතුමා කීවාලු මෙව්ව අපි ආගිය තැන් වෙච්චි මේ සක්වලම පාලනය කොලහැකි උත්තමය උඹ වෙච්චි ඉතිං මක්කටද මං සේනාවක් එක්ක එන්නේය කියල. අන්න ඒමයි අපේ සීතාත්තට සක්වලේම උන් සලකල තියෙන්නෙ . මෙව්ව ආඩම්බර නොවී ඉන්ට ඕනි කාරණා නෙවේය කියල වැටහෙනව ඇතිනෙ.

ඔය හමුවීමෙදි ඉරේව්වන්ගෙන් වෙන අඩත්තේට්ටම් ගැන හා මයිලේ ඉදන් අලි මයිල දක්වාම විස්තරේ හෙලි කොරල අනේ අපිට මෙවුන්ගෙන් ගැලවෙන්ට උදව් කරන්නට මයෙ දෙයියො කියාල හඬාවැටිලා තියෙනව. සීතාත්තා යුදකෙරුවාවට එතරම් කැමැත්තක් නොදක්වපු නිසා මේ සන්තෑසියෙ අක්මුල් සොයාගෙන , ආයුධයකට ගතහැකි ස්වාභාවික දේවල් මොනවාදැයි බලා කියාගෙන එන්ටය කියල බැඳගෙන උන්න යක්ශයෙක් පිටත්කරල එවෙලෙම.

දැන් උබල හිතනව ඇති ඇයි ඒ උත්තමයට යන්ට තිඹුනා නෙවෙද ඇයි ගෝලයක් පිටත් කලේය කියල. ඒ කාරණාව මෙන්න මේකයි.

දැන් හිතාපල්ලා සක්වලම පාලනය කලහැකි උත්තමයා හඳට ගොඩබැස්සාම ඉරේ එව්වන්ට එතමම මල මූත්‍ර පිටවෙන්ට හැකී. එහෙම උනාම ඔය මුත්‍රා ගලාගෙන ගිහින් ගිනි මූලාශ්‍ර නිවිලා යන්ට හැකී. යුද්ධ කරනටත් එවුන් කාල ඇඳල ඉන්ටත් මුදල් කොරගන්ට හැකි එකමදේ එව්වන්ට නැති වුනාම මොනවයින් මොනවා වෙයිද ? අපි වගේ නෙවෙයි සීතාත්තා දුරදිග බලලා වැඩකරන උත්තමයෙක් කියල දැන් උඹලට වැටහෙනව ඇතිනෙ.

රටතොටේ විස්තරේ බලාගෙන යන්ට ආව යක්ෂය දැකල තියෙනව මුළු හද පුරාම සාරුවට වැවිලා තිබ්බ බෝගයක්. එවෙලෙම පින්තූරයක් එවලා සී තාත්තගෙ අනුමැතිය අරගෙන එයින් ගහක් පිටින් ගලවං කැලෑ මන්ඩියට වෙන්න ඉන්දලා තියෙනව. වෙන දේශෙකින් ගෙනාව ගහක් නිසා ගමේ උන්දල බයවේවි කියල තමා ඔය කැලෑ මණ්ඩියෙ ඉන්දල තියෙන්නෙ. සී තාත්තාට වැටහුනාලු මේක තමාය ගැලපෙනව ආයුධය අපේ රටේ හෙල්ල වගේ විසිකරන්ටත් හැකිය සිහින් වුනත් ශක්තිමත් නිසා හොද ඉලක්කයක් ගන්ටත් හැකිය කියල.
ඊලග කාරණාව වෙලා තියෙන්නෙ හඳේ එවුන් සක්වල පතුරවගෙන තියෙන කීර්තිනාමයට කැලලක් නොවෙන්නත් සී තාත්තගෙ කෙනෙක් රිදවීමට අකමැතිවීමත් කැටිකරල මේක ආයුධයක්බවට හරවන එක. ඔය වෙලේ තමා ඒ උත්තමය වටහාගෙන තියෙන්නෙ එක ගලෙන් කුරුල්ලො කීපදෙනෙක් නෙලාගන්ට හැකිය කියල. ඉරේ එව්වො ඔය හැටි නාක වෙලා තියන්නෙ උන්ගෙ ජනගහණය වැඩි නිසාය , ජනගහනය පාලනය කලෝතින් අනික් එව්වනට වෙන අරියාදුවලට කළුගලක්ම තියතෑකිය කියන කාරණාව සිහියට අරං ගහට මතුරල තියෙනව මේ ගහේ හටගන්නා ඵලය සතුරෙක් ඉලක්ක කරගෙන එල්ලකලාම සතුරා වන්ධභාවයට පත්වෙන්ට ඕනෑය කියල. හඳේ එව්වන්නට ජාති ජාතිත් පාපයක් නොවෙන ආයුධයක් ගොඩනගල දීලා තියෙන්නෙ අන්න එහෙමයි. මේ ගැන සන්තෝසවුන හඳේ රජ්ජුරුවෙ චන්ද්‍රරක්ඛිත කියල ගරු පට්ටමකිත් පූජාකරනට යෙදිලා තියෙනව. ඒ සන්නස් පත්‍රය එදා පෙට්ටගමේ අස්සෙ ගැහුව ගමන් තාමත් එතනමයි. සීතාත්තා ඔය පට්ටං තානාන්තර වලට කෑදර ආසකල මිනිහෙක් නෙවේ. 

දැන් මේ කතාව මම දන්නෙ කෝමදැයි කියල බොලාල කල්පනාකරනව ඇතිනෙ. ඒ උත්තමයව මම දෑහින් නොදැක්කට අපේ සීයා ඔය කාරනා කාරනා සියල්ල දෑහින් දැක්ක මිනිහා වෙච්චි. ඔය සිදුවීමෙන් පස්සෙන් පහු කාලෙක සී තාත්තා මුලිච්චිවෙන්න ආව ලෝක පරසිද්ද මැංචෝසන සාමිතුමා ඉර හඳ යුද්ධ විස්තර ආයුධ ගැන හරිම පුදුමයකින් කතාකොලාලු. සීතාත්තා නෙවේලු එක කෙලබිඳක් බිම හෙලුවෙ. උන්දැ අපේ සීයා දිහෑ බලල අර සුදුම සුදු රැවුල දෑතින් පීරලා කටකොනකින් සිනාවක් පෑවලු. ඒ ඉඟිකොරාල තියෙන්නෙ මෙව්ව කාගෙවත් කනේ තියන්ට එපාය කියන එක තමා. 

එහෙමවුනත් මම මෙහම මේ කාරණා සටහන් කොරන්ට යෙදුනේ අපේ පවුලේ උදවියගෙ කියුම් කෙරුම් තව දුරටත් එක එක පසික්කාඩුවන් පුම්ඹන්ට අවභාවිතාවෙනවා ඉහුලුම් නොදුන්න නිසා. මේ කාරණා වල ඇත්ත නැත්ත ගැන හඟිස්සන ඕනි එව්වො ඉන්නවනම් මැංචොසන් සාමිතුමාගෙ සටහන් බලන එකයි ඇත්තෙ. 
දැන් දැන් මේ රටේ උන්දැලට කෝමත් විශ්වාස පරදේශක්කාරයන්ගෙ වචන විතරක් වෙච්ච්කොට ඊට වඩා මොන සාක්කියක් සපයන්නද මම.

ගෙහුං එංඤං.